شکون حنا؟
شكون المشرفين على السّيت و شنو الهدف منّو.
حنا ناس مهتمين بالدارجة المغربية، بالکتابة بيها، و بالحضور ديالها فالويب. هاد السّيت تدار باش تکون کاينة بلاصة واضحة و مرتّبة للدارجة: لغة حيّة، يومية، و أساسية فحياة المغاربة، ولکن مازال الحضور ديالها فالکتابة و فالإنترنت ماشي بقدّ القيمة ديالها.
علاش ديرناه؟
الهدف ديالنا بسيط: نجمعو و نبرزو المحتوى اللي عندو علاقة بالدارجة المغربية، و نسهلو على الناس يلقاو شنو تقرا، شنو تکتاشف، و شنو تتابع. الدارجة ماشي غير هضرة ديال الزنقة ولا الدار؛ راها لغة ديال الذاکرة، الضحك، الحياة اليومية، النقاش، و حتى الکتابة و الإبداع.
شنو تلقى هنا؟
- پوسطات و مقالات على الدارجة
- کاطالوݣ ديال الکتوبا المکتوبين بالدارجة
- پروجيات عندهم علاقة بهاد اللغة و بالحضور ديالها الرقمي
شنو ماشي هو هاد السّيت؟
هاد السّيت ماشي پلاطفورم ديال تعلّام الدارجة، و ماشي حتى جهة رسمية باش تحكم شنو الصحيح و شنو الغالط. حنا کانشوفو الدارجة کلغة حيّة فيها تنوّع، و کاتتبدّل من منطقة لمنطقة و من جيل لجيل. اللي مهم عندنا هو التوثيق، الإبراز، و توسيع الحضور ديالها فالفضاء الرقمي.
و حتى هاد التوجّه ماشي ضد العربية الفصحى ولا تامازيغت ولا أي لغة أخرى. المغرب بلاد متعدد اللغات، و الدارجة جزء أساسي من هاد الواقع.
بغيتي تساهم؟
إلا کان عندک شي کتاب، پروجي، ولا پوسط بغيتيه يتزاد، مرحبا. السّيت مفتوح للاقتراحات و للمساهمات اللي تقدر تزيد لقدّام الحضور ديال الدارجة و توسّع المحتوى ديالها.
الدارجة موجودة، حيّة، و کاتستاهل تکون مقروءة حتى هي.