فإشارة للتمکّن ديالنا کمغاربة من اللغات البرانية، واحد الکوميدي فواحد الشّوو کان ݣال هاد العبارة علينا: «باش مّا کاتهضر حتى أنا کانهضر».

😂What You Speak I Speak! 🇲🇦 - يوتيوب

الناس ضحّکاتهوم و جاتهوم على قلبهوم حيت بصّح.

تهضر معانا بالفرونسي، نجاوبوک بالفرونسي. تهضر معانا باللونݣلي، نجاوبوک باللونݣلي. تهضر بالصبليونية، نحاولو نجاوبوک حتى بالصبليونية. کاتهضر بشي لغة اخرى؟ شي مغربي فشي بلاصة بشي طريقة غاتلقاه فهمک و غايلوح ليک شي کليمات بلغتک.

من تمّا بقينا کانعاودو فيها بکل فخر. «What You Speak I Speak»

زعما علامة و دليل على الذکاء ديالنا و على الإنفتاح ديالنا على العالم.

ولکن إلا تمعنّا و حلّلنا مزيان هاد العبارة ديال «باش مّا کاتهضر حتى أنا کانهضر»، غانلقاو موراها عبارة دقيقة کثر، اللي غير ما کانݣولوهاش بالجهد:

«رتاح نتا و هضر باش مّا کاتهضر، أنا ندير المجهود نفهمک و نجاوبک».

کانخمّمو للبرّاني يکون مرتاح قبل حتى ما نسوّلو واش حنا براسنا مرتاحين. و کاننخّلو اللغة ديالنا فوسط بلادنا تحت السميّة ديال الضيافة.

هانا نزيد نشرح…

سير دخل لشي ريسطورة مزيانة فکازا ولّا الرباط و قرا الموني. فأغلب الحالات، غاتلقاه غير بالفرونسي. دخل لشي سيت ديال شي شرکة ولّا شي سيرڤيس مغربي و غاتحس باللي الفرونسي هي اللولة، ما کانتعاملوش معاها بحال شي لغة برانية، بالعکس، اللغات الرسمية ديالنا هوما اللي کاتقاهم على الهامش ولّا مميّکين عليهوم ݣاع. نفس الشي فشي أحياء، شي محلات، شي مدارس، شي مکاتب، الفرونسي خدّامة بحال شي پاسپور اجتماعي، بحال شي کود، شي ليمارة ديال الکلاس د الواحد، ديال «الناس اللي لاباس عليهوم» و الناس اللي «قاريين».

أهّاه و الدارجة؟ و الأمازيغية؟ و العربية؟

هادوک ديال النکات، ديال العائلة، الدباز، السوق و الزنقة، و الهضرة د مول الطاکسي. ماشي د العلوم، ماشي د الوزارات و السفارات و البيزنيس و الريسطورات الهاي. هادوک لغات ديال الخوا الخاوي، ما خدّامينش للناس اللي باغيين يبانو فاتو المغرب واخا کبرو و مازالين عايشين فيه.

هادي را طبقية ماشي تعددية لغوية. و ݣاع المغاربة عارفينها طبقية حيت ݣاعهوم حسّو بيها.

سير لروما. تمّا عوّل غير على الطاليانية، عندک الزهر إلا تلاقيتي شي حد يهدر معاک غير باللونݣلي عاد إلا يهضر معاک بلغتک نتا. الـdefault باين: نتا فالطاليان، اللغة المحلية هي اللولة. تمشي لمدريد، الصبليونية هي اللولة. تمشي لإسطانبول، غاتلقى الترکية هي اللولة.

ولکن تجي لکازا، المغربي هو اللي خص يدير المجهود و يکون فخور أنو محلول لغويا لکلشي.

المشکل ماشي فداک التوريست ولّا البراني اللي جا لعندنا. بالعکس أغلب التوريست کايقبلو اللغات المحلية و أصلا کايکونو عوّالين يديرو شوية د المجهود باش يسلکو ديک السويمينة اللي جايبين معاهوم، خص غير البلاد براسها تکون کاتحتارم اللغات المحلية ديالها. بالعکس، التوريست يعجبو الحال يتعلّم و يدّي معاه شي کليمات.

المشکل عندنا حنا، داخلي و غارق. المشکل فالمغربي اللي کايسحابلو الفرونسي کاتردّو علا من الناس. ديک البيزنيس المغربية اللي کايسحاب ليها الفرونسي کاتردها راقية. ولّا ديک المدرسة المغربية اللي کايسحاب ليها الفرونسي کاتردّ ديک القراية جدية کثر. المشکل فداک الأب ولّا الأم اللي کايتخلعو إلا ولدهوم ما تعلّمش الفرونسي، و کاع ما مسوّقين إلا ولهدهوم ما کايعرفش يقرى ولّا يکتب ولّا يعبّر باللغات د البلاد.

کنت تلاقيت واحد الفرانساوية فالصويرة، أول مرّة غاتسافر برّا فرانسا، عاودات لي کانت متحمسة غاتزور بلاد جديدة و ثقافة اخرى، مشات ݣاليک شهر قبل ما تسافر کاتدير الدروس فاللونݣلي، باش زعما تعلم واحد اللغة عالمية باش ملّي تسافر تلقى باش تديپاني. ساعة ملي جات ݣالت ليا «تصدمت، کانلقى المونيات فالريسطورات و البلاکات و کلشي بالفرونسي، و اللي هضرت معاه کايجاوبني بفرونسي حسن من ديالي».

تقدر تبغي تسلّکها بحقّا الاستعمار اللي دار لينا هاد الشي و بلا ما نحکّو على الدبرة…

و لکن البراني ما دارش هادشي بوحدو، حتى حنا شارکنا، حتى حنا کمّلنا من موراه، و ݣاع حنا اللي ردّينا الفرونسي هي اللغة ديال النجاح فبلادنا، فاللخر نݣولو علاش اللغة ديالنا ما ناجحاش و ما واصلاش.

حنا اللي البارح ݣولنا حقا الخدمة کاتدار بالفرونسي و العربية ما مواکباش البحث العلمي، إيوا التعليم العالي ضروري يکون بالفرونسي. اليوم ولينا فحقّا الدراري کايوصلو للتعليم العالي و ما کايفهموش مزيان أجي نديرو الثانوي و الإعدادي بالفرونسي تا هو. غدّا، نݣولو خص تا الابتدائي يکون بالفرونسي باش نهرسو الحاجز اللغوي من بکري.

بيعنا لراسنا الوهم ديال لغتنا ما نقدروش نديرو بيها التعليم العالي، و ما نقدروش نديرو بيها البيزنيس، واخا کانشوفو بلدان صغر منا، بلدان ديال مليون و نص نسمة بحال إستونيا مثلا، خدّامين بلغتهوم فالتعليم و العلوم و البيزنيس من طرف لطرف، و حنا اللي بلاد کبر بشي 25 مرة تيّقنا باللي ما نقدروش، و باللي خصّ لغات برانية تمدّ لينا يديها، خص غير نحنيو ليها و نبوسوها.

بيعنا لراسنا الفکرة ديال العلوم، و الطّب، و الهندسة، و الوصول للفرص و المکانة ما يمکن يکون غير بالفرونسي، ولّا اللونݣلي عند شي وحدين اخرين.

إلا بقينا کانربّيو ولادنا على هاد الأفکار، و کل نهار ريسطورة تعاود الموني ديالها بالفرونسي باش تستهدف واحد الفئة، کل نهار بلاکة تبدّل باش تولّي «مفهومة» لکلشي، کل مرّة قسم فمدرسة ولّا يتقرّا بالفرونسي، غايجي واحد النهار نفيقو و نلقاو الهوية ديالنا تبدّلات بلا ما نحسّو. ماشي بسباب شي حد ما حاملناش، و لکن بسبابنا حنا اللي ميّکنا على لغتنا، و ديرنا القيمة للغات البرّانية فحاجة بحاجة وحدة بوحدة.

بسباب اللي کايݣول، «وا الفرونسي مهمة»، «اللونݣلي لغة عالمية»، «الدارجة غير لهجة»، «ش'غاتدير بشي شلحة»…

اللغة ماشي غير کلمات و جمل.

اللغة کرامة، اللغة ذاکرة، اللغة قوة.

اللغة کاتورّيک شکون کانتسناو يتأضابطا لشکون.

و حنا فبلادنا بلاصة ما البرّاني يتأضابطا لينا، حنا اللي خصّنا نديرو المجهود.

واحد المرة کنت خدّام معا واحد الميرکانية، عارفاني مغربي، و کانهضر الدارجة و العربية. و عرفات باللي کانفهم حتى الفرونسي، و خلاص معاها کانهضرو باللونݣلي. أ ݣالت ليا «واو، ناضي. شحال من لغة کاتهضر بالسلامة؟ أنا کانهضر غير اللونݣلي». ݣولت ليها «وا حيت غير اللونݣلي اللي غاتحتاجي».

بقيت عاقل على هاد اللقطة حيت شرحات ليا کلشي.

کاين اللي هانية يهضرو لغة وحدة، حيت العالم کايدور عليهوم. لغتو سابقاه قبل ݣاع ما يسافر هو. و کاين اللي خصو يلقّط اللغات باش يعيش، وحدة يهضر بيها معا الواليدة، وحدة يقرا بيها، وحدة يکتب بها «طلب مغادرة التراب الوطني»، وحدة يپويسطي بيها فلانترنيت، وحدة يخدم بيها مع الکليان.

بکل سذاجة، يقدر يبان ليک حنا واعرين و تعطات لينا فاللّغات. ولکن الصراحة هي هاد الوعورية تبزّزات علينا و تترينينا نتيّقو أن اللغات دياولنا ما کافيينش.

المشکلة ماشي هي کانهضرو اللغات. المشکلة هي اللغات دياولنا هوما الأقل احتراما فوسط بلادنا.

حتى واحد ما غايݣوليک ما تعلمش الفرونسي ولّا ما تعلّمش اللونݣلي، ولّا سدّ على راسک من العالم. بالعکس، التعلم د اللغات کايخليک تکون منفاتح، کايحلّ ليک بيبان، هادشي ما فيهش نقاش. غير خصنا نفرقو بين واش حنا اللّي باغيين ولّا بالزّز منّا و بين الإنفتاح و الاستسلام. المشکل ماشي عندنا لغات برانية فدارنا، المشکل هو يولّيو هوما مّوالين الدار.

بزاف عاشو هاد السيناريو: نتا فوسط بلادک، و يجي شي حد ما کايعرفک ما کاتعرفو و يهضر معاک بشي لغة برّانية. و تجي نتا بلا ما تفکّر ولّا تسوّل شنو هاد الشي کاتحاول تجاوبو حتى نتا بيها، تبدا تعصّر باش ترکب ديک الجملة بحال إلا کاتجر القط على الحصير.

ولّا نتا داخل لشي ريسطورة کلاس، ولّا جاي لشي انترڤيو د الخدمة، يجي خونا يبدا يقلقل فيک بالفرونسي، باش فاللخر يعبرک، يحکم عليک، ولّا ݣاع يضحک عليک و يصحّح ليک، تخايل.

مالک على حالتک؟ حتى واحد ما هزّ عليک السيف، ما کاينش شي قانون مکتوب کايبزّز عليک هادشي، نتا مغربي، و فالمغرب، علاش کاتحس براسک خصّک تکون ضابط الفرونسي؟ علاش يخلّيک شي حدّ تحس براسک صغير حيث ما هضرتيش مزيان بواحد اللغة برّانية؟ علاش کاتحني الراس، و کاتمثل، و کاتقبل تهز الحمل و تدير المجهود باش تا نتا تبان زعما مزيان فالکادر؟

هادا راه ذل، و ماشي حاجة طبيعية، ولکن تطبّعات عندنا.

نتا فالمغرب، ما تخلّيش الواحد يسحاب ليه أجي و هضر معايا باللغة البرانية اللي بغا. جا عندک شي حد کايفهم الدارجة (ولّا اللغة الأم ديالک بشکل عام) و هضر معاک بشي لغة اخرى، ما تکعکعش ليه و تبدا تلبّق فجملة باش تجاوبو و يبقى هو على خاطرو. جاوب بلغتک بلا حشمة بلا والو. ݣوليه «هضر معايا عافاک بالدارجة». ما بغاش؟ هضر نتا معاه بالدارجة. هادا احترام للذات ماشي عياقة.

ريسطورة عطاتک موني بالفرونسي، سوّل على موني بلغتک، ولّا سوّل علاش ما کاينش موني باللغات المحلية.

إلا بغيتي تهضر بشي لغة، ما تحشمش إلا غلطتي ولّا ما نطقتيش الکلمة کيما کاينطقها اللي أصلا کايهضر بيها.

بخلاصة ما تخلّيش اللي يعبرک بالتمکّن ديالک من اللغات البرانية، هادو بديهيات فأي بلاصة اخرى من غير عندنا حنا.

الاحترام ديالنا للغات دياولنا، کايعکس الاحترام ديالنا لراسنا. و يکذب عليک الکذّاب، احترامنا لراسنا هو اللي غايخلّي البراني يحتارمنا، و يضرب لينا الحساب.

إيلا ولّفنا للعالم باللي لغتنا هانية نلوحوها للجّنب، ما نتفاجؤوش إلا العالم لاحها للجنب.

إيلا ولّفنا للريسطورات باللي کانقبلو بالمونيات بالفرونسي، غايبقاو يطبعوهوم هاکّاک.

إيلا ولّفنا للناس باللي الدارجة و الأمازيغية غير ديال الزنقة و الهضرة الخاوية، عمّر غايّاخدوهوم بجدية.

نقدرو ننفاتحو على العالم بلا ما نخلّيو العالم يهجّرو لينا فبلادنا، يمکن العبارة اللي خصّنا نݣولو ماشي: «What You Speak I Speak» خصّ نݣولو: «What I Speak I Speak».

إيلا هضرت بلغتک، را حيت أنا بغيت و ختارتيت نهضر بيها. ماشي حيت حشمان من لغتي، ولّا حيت أنا قلّ منّک.

و فبلادي، لغتي ماشي کاتدق فالباب کاتسنى الإذن يدخّلوها، لغتي مولات الدّار عندها السوارت.

و أي واحد بالصح کايحتارم المغرب غايحتارم هادشي.